صورة السيدة المطلقة فى خيال الناس

للأسف .. السينما المصرية ساهمت في رسم صورة ذهنية للسيدة "المطلقة " في خيال الناس .. ممكن نلخصها في ..
شكل " هياتم" وهي بترقص "بالكومبليزون " .. أو " ناهد شريف " و هي بتعمل أي حاجه !!
فالحقيقة حسّيت أني محتاجة أعمل شوية "updates " للصورة عشان نهدا على بعض شوية .. و طبعاً لكل قاعدة "لامؤاخذة" شواذ !!

١- المطلقة مش "بتنونو" أو " بتهوهو" و مالناش موسم تزاوج .
٢- مبنلحسش تفافة غيرنا و بالتالي مش بنتجوز واحد على مراته .. متضيعش وقتك ..
٣- معندناش مشاكل نفسية مع الرجالة .. بس بنشم "ولاد الكلب " من على بعد "بداية من " 250 كيلو .. الإسكندارنية ياخدو بالهم معايا ..
٤- أحنا "أب" و "أم" و " أخت" و "دادة" و "سواق" و " شيف" و "مدرس" و " محاسب " و "ممرضة" و " أخصائية نفسية" .. و بنعمل فقرات " الساحر " و " الأراجوز " جمعة و سبت ..
إن فضل وقت يا دوب "ننام " عشان نلحق أكل عيشنا .
٥- عارفين قيمة الوقت كويس و " بطلنا اللي يعطلنا " .
٦- "زمايلنا "اللي "بيتسهوكو" و "مديرنا "اللي "بيتحرشو" و "أحبائنا "اللي على الفيسبوك اللي "بيستطادو في المية العكرة" .. اللي قدرت تخلع جدرها من الأرض .. قادرة تخلع "رأسك من على رقبتك " .
٧- بنلبس حلو و بنضحك من قلبنا و بنخرج مع أصحابنا .. بس مش عشانك .. إنت خارج مجال الرؤية أصلاً .
٨- مبادئنا ..
"الحياة "و "السعادة " تسوى كتير ..
النهاية مجرد بداية جديدة ..
اللي إتلسع من الشوربه .. و اللي يجي على ولية ميكسبش ..

٩- إحنا اللي ربنا أدانا حقنا .. بس عبيدة ظلمونا ..
١٠- آخر حاجة .. "الكومبليزون " موضة و بطلت ..

بقول كفاية فرجة عالتليفزيونات .. اللي جابت تأخر ذهني لمجتمع متأخر في كل شئ