((تـــــــدلـــــــل ))
تدلل علينا يا شبيه الظبـي وش عـاد
تدلل ولك بامر الهوى شافـع عنـدي
ولك في خيال العاشق المهتوي ميعـاد
واجلس على غيمه وليلة قمـر نجـدي
اسافر معك لبلاد وانزل معـك لبـلاد
ومن غيمه لغيمـه ولا للسنـا وحـدي
رسمتك ضحوك الفجر يا فرحة الاعياد
ولمعة شعاع ينغمس في نـدى وردي
وغنيت بك صوت بقلب الهوى ميـلاد
ونغمة غلرام ذاب في لحنهـا وجـدي
اشوفك مطر هتان لا بـرق لا رعـاد
من الوسم يبعث بالصحارى زهر ودي
احبك وصل وبعاد احبك رضى وعناد
ولا يختلف وعدي ولا ينتقض عهـدي
(يغــــــــار ســـــمعـــي)
يغار سمعي و يشـره كـل وجدانـي
لا غاب صوتك نهار(ن) ما بلغ سمعي
ياللي لقيت بنواعس عينـك أوطانـي
هي ديرتي هي ملاذ القلب هي ربعي
أملي النّظر من جمالك يـوم تلقانـي
و احبس خيالك بعيني حبسي لدمعـي
لا شفتك اعيش في عيونـك ازمانـي
وآخذ من نجومها وأشعل بها شمعـي
من نورها سالـت الفرحـه بوديانـي
ومن سحرها قام يورق بالذهب زرعي
يا واحد الحسن مالك بالعـرب ثانـي
عطني شرابك وخذ قرطوع من نبعي
غريب الاطوار و الغربـات ميدانـي
هي غربة العمر وافق طبعكم طبعـي
اصبحت تغريبتي و اصبحت عنوانـي
يا واحدي بالهوا و اثنينـي و جمعـي
(مــــــــرتاح أحـــبك)
مرتـاح أحبـك ولا علّـمـت
حتى إنـت عييّـت أبيّـن لـك
البارحـه يـوم أنـا سلّـمـت
شكيـت لـو عيـنـي تـدلّـك
بـرقٍ لمـع بالعيـون وخفـت
مواجـع القلـب توصـل لـك
عساك في ناظـري مـا شفـت
كيـف المعاليـق يومِـن لــك
من خوفتي لا أحتـرق جنّبـت
هربـت مـن شمسـك لظلّـك
أخشى عليك الهوى لو طحـت
مــا تلّـنـي يـمّـك يتـلّـك
أبـي قليـلـك ولا حصّـلـت
بعضـك تركنـي مـع كـلّـك
ما أدري صواب أو خطا ما قلت
إنـك حبيبـي وأنــا خـلّـك
الرئيسية 
البوابة 
