أخطاؤنا الديكوريّة ... (صور من بيوتنا)

[size=18]أخطاؤنا الديكوريّة ... (صور من بيوتنا)

أنا أعرف يعني إيش تأثيث بيت وتزيينه ... وأعرف إش كثر ياخذ منا وقت وفلوس وجهد بدني وذهني لدرجة يمكن نفكر فيها حتى في الصلاة الله يتوب علينا ... وأعرف إن كل وحدة فينا تتمنى يكون بيتها أحلى بيت ... [/size]
[size=18]لكني اخترت الصورهذي تحديداً لأسباب:

1. لأن الصور ما عليها حفظ حقوق ... أنا لقيت بيوت سيئة جداً لكن صاحبتها حفظت حقوقها وما في الدنيا كلها شي يعطيني الحق إني أمسح اسمها واسم منتداها عشان أعرض الصور في موضوعي ... وفي بعض الحالات كانت الصور بدون أي بيانات لكن صاحبتها ما حللت ولا أباحت أي أحد ينقلها لمكان ثاني!

أكيد كلنا نعرف إن أكثر مواضيع يدخلها زوار في قسم الديكور هي اللي يكون عنوانها "صور بيتي" ... "صور غرفتي" ... "صور مطبخي" .... إلخ ... وأعتقد إني مافوّتّ ولا موضوع من هالنوعية بسبب حبي للديكور أولاً ... وبسبب مقدار لا يستهان فيه من الفضول البشري هذا ثانياً وبصراحة معظم اللي شفته كان مخيّب للأمل ... وأحياناً يسبب الصدمة ... ونادراً جداً أدخل موضوع من هالنوعية وأطلع وأنا أحس بإعجاب فما بالك بـ"انبهار"!

لاحظت إننا نميل للأثاث الدفش والـBulky واللمسات الـOver وفي اعتقادنا إن هذا الشي يعطي بيوتنا "فخامة" ... بدون ما نفكر هل الأثاث اللي حطيناه مناسب للمكان؟ وهل اللمسات اللي سويناها فعلاً أعطت المكان جمال؟ وهل كان التنفيذ سليم؟

للأسف أغلبنا نشوف بيت في التلفزيون مثلاً ويعجبنا ونجي نبغى نطبق اللي شفناه في بيوتنا بغضّ النظر عن ملاءمة هالشي أو لا ... فتطلع لنا المعادلة البشعة:
أفكار غير مناسبة + تنفيذ سيء = كارثة!

لما أشوف مسلسل خليجي فيه قصر كبير وفخم ويعجبني كثير وأحب يكون بيتي مثل هالبيت ... فيكون في اعتقادي إني أجيب كنب كلاسيك كبير وأحشره في غرفة ضيقة –معظمنا ساكنين شقق ومعظم الشقق غرفها ضيقة- وأسوّي لمسات وإكسسوارات مثلهم وأنام ذاك اليوم وأنا مبتسمة من السعادة وأول ما أصحى من النوم تشك تشك ألقط كم صورة للغرفة وأروح أنزلها في منتدى وأقول أمّنتكم أمانة تذكرون الله!!! ... في هالحالة ودك تردين وتقولين "لا حول ولا قوة إلا بالله" أو "إنا لله وإنا إليه راجعون" <-- هذا طيب ذكر لله
أو يقولون لك قولي ما شاء الله حتى لو ما أعجبك ... طيب ممكن يجي أحد يقول: ما شاء الله عليك اللي متحملة هالمكان وعايشة فيه ... والله ما أقصد سخرية ولا استهزاء بس مداعبة بسيطة <-- خلّي مداعباتك لك!

ومع ذلك تلقين كم رد من نوعية: روعة ... وكل وحدة تتنافس مع الثانية مين تقدر تحط أكبر عدد من "الواوات" ... بس حرام كذا ... والرسول صل الله عليه وسلم قال: "المستشار مؤتمن" ... فهي لما تسأل وتجاوبينها انتي تتحمّلين أمانة بكذا فاتقي الله في الأمانة ... وأنا ما أقول ردي عليها بفظاظة والا اسخري من ذوقها لكن لا تعطينها رد مخادع زي هذا ... وأيضاً صاحبة الموضوع ما لازم تتحسس من النقد ... أحياناً نلقى وحدة منزلة صور وكاتبة: أنتظر تعليقاتكم واللي عندها تعليق سلبي لا تردّ! ... كيف طيب؟ ... انتي تقولين عطوني رأيكم ... وتقولين ما أبي نقد؟ يعني كأنك تقولين امدحوا بيتي ... أو امدحوا ذوقي والا اسكتوا!!! ... لا حبيبتي ... فيه حكمة تقول: (من ألّف فقد استُهدِف)! ومعناها اللي يألّف كتاب مثلاً لازم يتوقع الهجوم مثل ما يتوقع المدح والموافقة لأنه أبرز نفسه وأظهرها أمام الناس ولازم يتوقع أي ردة فعل لأن الناس نظرتهم تختلف وردة فعلهم تختلف ... صح؟
مثل ما قلت عندنا ميل كبير للأثاث الضخم والمليان تفاصيل ... ونسمّيه "ملكي" عشان نزيد من إحساسنا بالفخامة ... بينما هذا النوع من الأثاث معروف باسم "الطراز الفيكتوري" Victorian style … طبعاً منسوب للعصر الفيكتوري ... عصر حكم الملكة فيكتوريا لإنجلترا ... يمكن عشان كذا نسميه ملكي

هذي نماذج منه للتوضيح

وبشوية بحث في قوقل صور عن Victorian style راح يطلع لك بدون مبالغة ملايين الصور سواء أثاث وديكور أو مجوهرات أو ملابس ... إلخ

أنا ما أقول إن هذا ستايل قبيح أو خطأ ... أنا أقول مشكلتنا غالباً نحط القطعة في مكان غير مناسب ... زي لو تلبسين عقد كبير على بلوزة مشغولة وفيها تفاصيل كثيرة ... أو تلبسين فستان سهرة ضخم ... في عزيمة غداء مثلاً ...

طيب ... خلينا نعرف شوية أساسيات بسيطة في اختيار الأثاث وتنسيقه مع الديكورات والإكسسوارات ... عشان نعرف وين كان الخطأ ... وبعد كذا بإذن الله نشوف مع بعض الصور ونعلّق على الأخطاء اللي فيها ...

نشوف القواعد الديكورية البسيطة اللي ممكن كل وحدة فينا نستفيد منها وتطبّقها ... هذي قواعد عامّة وما رجعت فيها لأي كتاب أو موقع في النت لأنها أشياء معروفة عند أي شخص له اهتمام بالديكور:

1. مراعاة المساحة والأبعاد:

ذكرنا من قبل إن من الأخطاء الديكورية عندنا إننا نحط أثاث يناسب القصور في شقة صغيرة ... أو نحشر غرفة نوم ضخمة في غرفة 5×4 ... أو نعلق اللوحات أقرب شي للسقف! ... أو نبعثرها على الجدران بطريقة عشوائية ... واللوحات حكايتها حكاية! ... وتعليقها على الجدران له قواعد وأسس ماهو شيء اعتباطي ...

فنقول بشكل عام بالنسبة للأثاث ... الغرف الواسعة يناسبها أكثر الستايل الكلاسيك والكنب اللي فيه تفاصيل وحجمه كبير ... ومن الخطأ إنا نرمي في وسط غرفة مثل هذي قطعة سجاد 2×3م ... لازم تكون سجادة كبيرة وفخمة تتناسب مع باقي الأثاث والديكور ... وطاولات خشبية مشغولة ... لوحات كلاسيك مذهّبة ... إكسسوارات راقية ... إلخ ... هذا كلام عام ...
الشقق الصغيرة والغرف الضيقة تحتاج مرايات كثير عشان تعطي إحساس بالاتساع ... طبعاً هذي من أقدم وأشهر حيَل الديكور ... ويناسبها الستايل المودرن وأطقم الكنب السمبل وعادة تكون على شكل حرف U أو L ... الطاولات طبعاً لازم تكون حجمها مناسب ... من غير المعقول تدخلين غرفة من كبر حجم الكوفي تيبل تضطرين تمشين على جنب بين الكنبة والطاولة عشان تجلسين! ... هذا خطأ كبير ... ومع الأثاث المودرن ما يناسب أبداً تكون الطاولات خشب محفور أو مثلاً طاولات زجاجية مع فولاذ مشغول ... إلا في حالات معينة تحتاج خبرة ومهارة كبيرة في تنسيق القطع مع بعض ...
بالنسبة للوحات ... الكلام فيها يطول ... ولها فن خاص في ترتيبها وتوزيعها على الجدار وفي الأبعاد المناسبة والارتفاعات اللي تتعلق على أساسها ...

فأقول باختصار لأن الكلام يطول ... القاعدة العامة هي إن اللوحة تتعلق على مستوى النظر بحيث إنك لما تكونين واقفة ماتحتاجين ترفعين راسك ولا حتى نظرك عشان تشوفين اللوحة ... وبالنسبة للوحات الكبيرة (أو الكثيرة) الأفضل إنها تتعلق بحيث يكون بين إطارها السفلي وبين أعلى نقطة في الصوفا أو سطح الطاولة اللي علقتيها فوقها مسافة 30 سم على الأكثر ...

فيه بعض القواعد عند خبراء الديكور بالنسبة لترتيب الإكسسوارات واللوحات ... منها قاعدة the A-shape وقاعدة the V-shape ... وخلاصتها إنك لو رسمتي خط وهمي من قمة كل قطعة من الإكسسوار أو الأثاث راح يطلع لك على شكل حرف A أو V ... وهذي صورة بسيطة للتوضيح والصور في النت كثيرة جـداً ...

هنا عندك لو ترسمين خط من قمّة النبتة لقمّة الكنبة لقمّة الأباجورة راح يعطيك شكل حرف V ... أعتقد وضحت الفكرة ... وتطبقين نفس هالكلام من فازة للوحة لكرسي مثلاً لو اتخذت واحد من الشكلين فهذا معناه إن ترتيبك سليم ...

وفيه أسلوب تقليدي جداً وهو أسلوب التناظر ... بحيث تحطين فوق الطاولة شمعدانين متطابقين وبينهم مثلاً زهرية صغيرة ... أو تحطين كرسيين بينهم طاولة ولوحة ... إلخ.

2. التنسيق:

عند أغلبنا رايح فيها ومصلّين عليه صلاة الجنازة ...
أعطيكم مثال ... مرة عضوة في منتدى نزلت صور بيتها الجديد وطالبة ملاحظات وتعليقات من باقي العضوات ... بصراحة تعلقين على إيش والا إيش؟ ... بيتها فيلا واسعة وتمام لكن التأثيث!!! ... الصالة واسعة جداً محطوط فيها كنب صغير مودرن ألوانه بعيدة تماماً عن لون الأرضية الرخام وتعتيق الجدران (وياكرهي للتعتيق) ... ومرمي على الأرض قطعة سجاد "مكرونة" (وياكرهي لهالمكرونة بعد) ألوانها مالها علاقة بألوان الكنب ولا بألوان الجدار أو الأرضية ... بصراحة كان الوضع مأساة ... لأن كل الصور كانت على هالمنوال ... البيت مبني على ستايل معيّن والأثاث متنافر معه تماماً ... وضاع جمال المكان مابين فكرة بيت في مسلسل وأعجبتني وحطيتها في بيتي + قطع سجاد على قدّ ماتبقى من الميزانية + لمسات لا بد منها بحكم التعوّد والألفة (كونسول في المدخل – أشجار صناعية بشعة – فازات رخيصة ... إلخ)
بصراحة هالبيت كان أول شي جا في بالي لما فكرت أسوّي هالموضوع لكن للأسف مالقيت الصور!

ياحبيباتي من غير المعقول أحط في غرفة كنب ستايل مغربي وأزيّن المكان بخليط من الفازات الصينية و الستاير المموّجة الطبقات وطاولات زجاجية و و و ... ونركم في هالغرفة من الموجود واللي قدرنا عليه ...

ولا هو معقول أسوّي غرفة فخمة وكلاسيك وأشتري كنب بآلاف وطاولات عليها القيمة بعدين أجي أملا الغرفة إكسسوارات من الهرم ولوحات رخيصة وعادة تكون من نوعيّة مودرن ما تتناسب أصلاً مع المكان ...

أنا ما أقول إن المكان ما يصير حلو إلا إذا اشترينا من أغلى المحلات ... ولا أقول كل شي رخيص سيّء بالعكس يا ما نشوف أشياء غالية وغالية جداً بس بشعــــــــة ما فيها ريحة الذوق وخاماتها سيّئة ... خصوصاً ما عندنا متابعة للأسعار ولا حماية للمستهلك زي الناس فكل واحد يحط سعر على كيفه ...
بس لازم نراعي التنسيق في بيوتنا ... تبغين غرفة Luxury لازم تكون كل الغرفة بأدق تفاصيلها على هذي الصورة ... والا خلّيك على السمبل أريح وأقل تكلفة غالباً ... بس ما هو ستايل خبط لزق انتبهوا!

فخلاصة الكلام ... لازم المكان يكون متناسق بكل شي فيه ... الجدار ماشي مع الأرضية ماشي مع الأثاث مع الإكسسوارات ... وخطأ كبير يكون قماش كنبتك مورّد وعليه طبعات ونقشات وتحطين معه سجاد منقوش ... خطـأ كبير ويخلي لك المكان زحمة ...

وإذا اخترتي ستايل معيّن التزمي فيه ...
دمج الستايلات مع بعضها يكون ناجح إذا كان على يد شخص محترف ... غالباً نلقى في التصاميم الأمريكية مثلاً غرفة مودرن بالكامل ومزيّنة بمنحوتات أفريقية مثلاً ... وتلقين المكان مذهل بجماله ... ليه؟ لأنه على يد خبير يدرس أدق التفاصيل قبل ما يحط أي قطعة ...
صعب عليك؟ ... طيب شوفي لك صورة عاجبتك من شغل محترف ديكور وطبّقيها بحذافيرها ... سامعتني؟ بحذافيرها ... بكل مافيها ... كذا سهل والا؟ بس لاحظي إن بعض الأفكار في الصور اللي نشوفها ويسحرنا جمالها تكون أحياناً مجرد استعراض مهارة وأعمال إبداعية غير مناسبة للبيوت خصوصاً إن غالب البيوت فيها أطفال ... ولو ما عندك أطفال بيجيك زوّار بأطفالهم ... فلازم الشي اللي نحب نسوّيه يكون واقعي ومناسب للحياة اليومية ...

3. الإتقان:

من أسوأ الأشياء اللي نشوفها في بيوتنا الشغل غير المتقن ... للأسف معظم العمالة اللي عندنا غير مدرّبة ... جايين من بلدهم ما يعرفون شي ويجلسون يتعلّمون فينا ... فحرام أجيب عامل وأعطيه مبلغ وقدره عشان يسوّي لي تعتيق فاشل (ومعظم التعتيق اللي نشوفه كذا) ... أو يخربط لي بالمعجون شكل جدار حجر ... أو يرسم لي رسمة غبيّة ... بكذا بدل ما أضيف جمال لبيتي ... خليته قبيح 100%

والأدهى والأمرّ وسامحوني ياللي تسوون كذا ... بس المصيبة جد لما نجي نسوّي شي بيدينا بدون مايكون عندنا خبرة ومهارة ... ما يكفي إني أشوف طريقة أو فكرة في النت وأجي وأنفّذ شي "يشبه لها" بعدين أجلس أتباهي بلمساتي وشغل يدي ...
حبيباتي الاجتهادات اليدوية اللي نشوفها في البيوت المعروضة صورها في المنتديات معظمها فااااااااااااشلة مع احترامي للجميع ...
ما عندك حسّ فنّي ولا خبرة في العمل اليدوي ولا قدرة على الابتكار إذاً ليه تتعبين نفسك؟ أكثر شي يخليني أبكي لما تجي وحدة تسوّي تعتيق نسكافيه زي ما يسمّونه ... أوترسم على جزء من الجدار قوس في الزاوية وترسم وسطه مستطيلات ... بزعم إن هذا جدار حجر!!! ... للأسف الفكرة سيئة والتنفيذ سيء إش بينتج لنا؟ ...

المثل يقول: أعطِ الخبز خبّازه ولو أكل نصّه ... لأن الخباز أعرف بالخبز ... بس لاحظي قلنا "الخبّاز" ... اللي يدّعي إنه "خبّاز" وإنه الخبير اتركيك منه ... والا ارمي فلوسك بالزبالة أرحم لك ... على الأقل ما راح يبربس ببيتك برابيس تفشّل وياخذ فلوس على كذا ...

هذا غير البلاوي اللي يتركونها وراهم وتحتاج تنظيف ودعك وفرك وتخليك تكرهين نفسك لما فكرتي تجيبين عامل للبيت!

الخلاصة ... عندك فكرة حلوة؟ هاتي شخص ينفّذها لك بنجاح ... اسألي وابحثي واتعبي لحد ما تلقين الشخص المناسب ... أو نفّذيها بيدك إذا كان عندك مهارة كافية ... غير كذا ترى الجدار البسيط المدهون لون حلو وعليه لوحة بسيطة وتحتها كرسي أو طاولة فوقها قطعة إكسسوار أجمل بكثير من خنبقة المنتديات والعمالة الفاشلة ....

4. البساطة ...

ليه؟ ... لأسباب ... الشيء البسيط أسهل في التنفيذ ... الشيء البسيط غالباً يكون مظهره جميل ... والشيء البسيط غالباً تكلفته أقل ... الشيء البسيط البعيد عن الصرعات والموضات يدوم لك مدة أطول بكثير ما يحتاج تغيير كل شوي ... عشان كذا ينصحون العرايس مثلاً إن شعرها ومكياجها يكون سمبل قدر الإمكان عشان لما تشوفين الصورة بعد 20 سنة مثلاً ما تضحكين منها ... فالبساطة غالباً هي الفائزة

مافي داعي للزحمة وتكديس الأثاث والإكسسوارات في الغرفة عشان نحس إنها حلوة ... أنا مرة شفت صور لبيت وحدة تطلب نصائح ومساعدة ... وبصراحة كان يبغى لها فريق إسعافي كامل يساعدها ... كل جدار تقريباً عليه رف ... والرف مليان إكسسوارات وشموع ونبتات ودبدوبات! وخرابيط ... بدون مبالغة ما كنتي تلقين مكان فاضي تحطين فيه علبة كبريت ... والأرض محشورة فيها كراسي وطاولات وكنبات في كل شبر ... وكل طاولة فوقها زحمة إكسسوارات من أبو ريالين وما أشبهه ... يعني نروح للأماكن الرخيصة عشان نشتري أكبر كمية ممكنة؟

الخلاصة ... معظم صور الديكور اللي نشوفها وننبهر فيها تلقينها بسيطة وما فيها تعقيد وسهلة التنفيذ بشوية مجهود ... وشويتين فلوس

5. التجديد ... والبعد عن النمطية:

ومع الأسف هذا أكثر شي مضيّعنا ... ما نحب نفكر ... ما نحب نتعب ... ما نحب نبدع ونتميّز ... شعار أغلبنا "رأيت الناس يفعلون شيئاً ففعلته" ... بدليل الصور اللي من بيوتنا فيها قواسم مشتركة كثيرة ... كنب كلاسيك – ستاير ثقيلة ومعقدة – طاولات خشب محفورة – مفرش مكرمش فوق الطاولة وفوقه صحن فيه كور! – التعتيق البايخ اللي راحت موضته وما زلنا متعلقين فيه – التطقيم – المداخل التقليدية (كونسول) – النبتات الصناعية البشعة ... إلخ
يعني باختصار كثير من البيوت نسخ مكررة من بعض ... نادراً تلقين وحدة عندها جرأة وإبداع بحيث تخلي مدخل بيتها رف ولوحة وتحته كرسي أو جرة فخارية كبير مثلاً ... نادر تلقين طاولة ما فوقها مفرش مكرمش حتى لو كانت الغرفة كلها مودرن!!! ... المفارش خلاص صارت دقة قديمة وبايخة فما بالك إذا كان مفرش قبيح بأهداب في أطرافه ... ومحطوط فوق رف أو طاولة بحيث يتدلدل في الهوا على شكل مثلث؟ هذي حركة الظاهر جدتي كانت تسوّيها ببيتها وما زلنا نشوفها للآن ... وفي بيوت جديدة توّها مبنيّة ... طيب ليه؟
الطاولة الدائرية اللي في ركن الغرفة وفوقها مفرش كبير ومرصوص فوقها طقم إكسسوارات ... صحن كبير على قاعدة وصحن عميق فيه كور محفورة وفازة وشمعدان!!! ... هذي كلها خلاص صارت شي بايخ وقديم وما يضيف للمكان أي جمال ...
لازم يكون عندنا جرأة وإبداع وقدرة على التغيير ... بعطيكم مثال ... مرة كان عندي طاولة كبيرة تحتها قطعة سجاد سادة تماماً ... خطر في بالي أضيف عليها شي ... جبت مفرش هندي مستطيل وفرشته فوق السجادة بشكل مائل ... كانت مجرد تجربة وأعجبتني النتيجة

بصراحة نفسي أحفر حفرة كبيرة وأولّع فيها نار وأرمي فيها كل الإكسسوارات الطقم والطاولات الدائرية والمفارش والسجاد المكرونة والنبتات الصناعية الرديئة والكونسولات التقليدية والستيكرز اللي صايرة صرعة والتعتيق والرسم على الجدران ... كأني انفعلت شوي!

تبغين تأثثين بيت جديد؟ تبغين تجدّدين غرفة عندك؟ ... اسألي عن الجديد وابحثي في النت وخذي أفكار ونسقيها مع بعض تطلعين بنتيجة ولا أروع ... لكن إيّاك تروحين تسألين عامل في محل عن الجديد ... لأنه دايركت بيقول لك إن اللي عنده جديد وآخر شي نزل والطلب عليه كبير بلا بلا بلا ......... اسألي الناس اللي تثقين في رأيهم ... وعندك الإنترنت تلقين فيها كل شي تحتاجينه في أثاث وفي غيره!

أكرر اعتذاري لكل صاحبة منزل شافت صورها هنا في موضوعي وأنا أدري إن المكان ممكن يكون أجمل بكثير مما هو في الصورة لأن معظم التصوير بكاميرا جوال ... أوتكون زاوية التصوير سيئة ... والإضاءة كذلك ... وأدري إن البعض ممكن يعتبر كلامي فلسفة فاضية ... لكني بحاول أتكلم فقط عن الأخطاء الموجودة بدون فلسفة ... وبدون ادّعاء مفهومية ... أنا مجرد مخلوقة عندها شوية اطلاع على عالم الديكور ... وحبيت نستفيد من بعض ...

ونبدأ بالصور

طبعاً واضح جداً إن المشكلة الأساسية هنا في السجادة ... غرفة واسعة كذا يناسبها سجادة كبيرة وفخمة ... السجادة هنا صغيرة وأقل من مستوى باقي الأثاث ... وما أنسى المفرش لأنه في نظري ما عاد يعطي أي جمال ... فكرة المفارش صارت فكرة مبتذلة من كثرة ما نشوفها في كل بيت وكل مسلسل ...

هنا مثال واضح على التنفيذ السيّء اللي تكلمت عنه ... شوفي كيف العامل المجرم بزعمه مسوّي جدار من حجر ... وتخيّلوا معي لو كان الجدار سادة وبسيط ومعلق عليه لوحة حلوة فوقها سبوت لايت ... وعلى طرف المغسلة نبتة طبيعية صغيرة ... بالله كيف راح يكون الشكل؟

المعذرة أختي ... الدنيا صايرة أحمر×أحمر ... التقليمة اللي في الجدار أوفر بصراحة ... الأثاث واللمسات كلها مودرن والستارة كلاسيك ثقيلة ...
نشوف زاوية ثانية من المكان ...

الجدران كلها مقلمة! ... الكنب أحمر والطاولات أحمر والسجاد أحمر بعد؟ ... أوفر لأبعد حد مع احترامي

النوعية هذي من أقمشة الكنب مستهلكة وبشعة ودقة قديمة جداً ... ومهما حاولنا نخليها تعطي المكان جمال صدقوني راح تسلب منه أي جمال ... أنا ما أقول لازم نشتري كنباتنا من أرقى المحلات ... بالعكس شفت مرة عند ناس في استراحتهم أطقم كنب كلاسيك رائعة عبارة عن صوفا ثلاثة أشخاص وصوفا شخصين وكرسيين فوتيه ... يعني طقم كنب كامل وبسعر 1500 ريال!!! ... وقالوا لي إنه من المحلات اللي جنب الحراج في الرياض ... يعني ممكن نجيب شي مرتّب وبسعر بسيط بدل ما نحط فلوسنا في شي قبيح ... صح؟

والنقطة الثانية استخدام خداديات (كوشنز) من نفس قماشة الكنب ... هذا خطأ كبير!

هنا نرجع لكلامنا عن التنسيق والملاءمة ... في نظري قطع السجاد الصغيرة على شكل روز تناسب غرفة بنوتة صغيرة ما تناسب "قلب البيت" اللي هي الصالة الرئيسية ... ودخول لون مثل اللون البنك في كل قطعة في الصورة أعتقد إنه سلب المكان طابع الرسميّة والفخامة ... فإن كانت الصالة هذي هي مكان الاستقبال الرسمي في البيت فأظن إن الألوان تحتاج تعديل ...

هنا أشياء كثيرة من اللي حكينا عليه ... الجدار إياه ... الكونسول التقليدي المستهلك ... المفرش اللي في نظري ما أضاف أي جمال ... الفازات اللي في الأرض برضو أقل من عادية ... تخيلوا معي إن الجدار كله بلون واحد حلو ... وعندنا طاولة خشب بسيطة فوقها أباجورة وقطعة إكسسوار بسيطة وجنبها مثلاً كرسي وعلى الجهة الثانية من الجدار لوحة حلوة ... أعتقد الوضع بيكون أفضل كثير ...

شفتوا الفريمات؟ ... الحجم غلط ... الأبعاد غلط ... وحتى طريقة تثبيتها غلط ... رغم صغر حجمها بعضها واصلة فوق إطار الباب! ... وبعضها ورغم صغر حجمها مايلة!
بالإضافة إلى سلة المهملات الله يكرمكم اللي المفروض ما تكون في مكان ظاهر حتى لو كان المكان هو جلسة العائلة ...

نترك اللوحات الكلاسيك والكونسول الرخام لأنهم أقرب شي يمشي مع الأرضية ومساحة المكان ... لكن المفرش هل أضاف شي؟ ... الشمعدان هل هو متناسق مع اللي حوله؟ الستيكرز اللي في الصورة هل تتناسب مع الستايل الكلاسيك؟ أظن الإجابة على هالأسئلة هي: لا ... ولا كبيرة بعد ...

أول كلمة جت في بالي يوم شفت هالصورة هي: زحمة
الجدار بحد ذاته مشكلة ... الشغل عليه غير متقن وقاتم جداً ... وجدار بالشكل هذا يضيّع تركيز العين على أي شي يتعلق عليه ... تشتت بصري فعلاً ... ثم الجدار مربعات والأرضية مربعات وهذا من لون وهذا من لون ... والكراسي من لون والتعليقة على الجدار من لون ... الورد ... الطاولة ... السجاد ... كثرة التفاصيل في الصورة تسبب ربكة ...

تنسيق الألوان والقطع مشكلة فعلاً ... أنا أتمنى ما يبيعون عندنا إلا كنب سادة ... السادة يندمج بسهولة مع اللي حوله ... لكن هنا الكنب متنافر مع السجاد ... ومع لون الجدار ... ومع الستاير ... لأن الخامات الموجودة أساساً ما بينها أي انسجام ...

قطع السجاد على الأرض ما بينها تناسق وما أضافت أي جمال في رأيي ... الورود الصناعية البشعة أحسّها سبّبت بشاعة للزاوية اللي هي فيها ...
ياليت إذا حبينا نستخدم نبتات صناعية من ناحية إنها أدوَم وأسهل في العناية ... ياليت نختار نوعيات جيدة ... محل الفرائد على شارع التحلية عنده أشياء معقولة ... وعالم ساكو عندهم قسم كامل للنباتات الصناعية ... أما نبتات العويس وطيبة اللي جاية من أسوأ مصانع الصين وتايوان فاعذروني لا يمكن تعطي جمال وأناقة على الإطلاق ... حرام ندفع مبالغ كبيرة على البناء والدهانات والأرضيات والأثاث ... وبعدين نطفي جمالها بقطع قبيحة مثل هذي ...

حبيبتي أكيد بذلتي كل جهدك في تأثيث وتزيين بيتك ... بس الزينة اللي حاطتها زينة أفراح ومناسبات ما ينفع تكون شي دائم لكراسي طاولة الطعام ...

الصورة هنا بشكل عام ماهي سيئة ... لكن بالإمكان الغرفة تكون أجمل ...
أول شي السجادة مودرن واللي حواليها كله كلاسيك ... هنا يلزم سجادة كبيرة عليها القيمة ومليانة نقوش بألوان غامقة ... لأن لون الكنبة باهت ونقشاتها باهتة فلازم شي يحيي المكان ... بعدين السيراميك اللي يسمونه "سجاد" مزعج بصراحة مسوّي إطار يخربطك في موازنة السجادة معه فالأفضل نغطيه كله ونرتاح! ... قطع القماش المهدّبة اللي فوق الكنبة حركة قديمة وما فيها أي جمال بالإضافة للكوشنز اللي من نفس خامة الكنبة... أنا نفسي يكون عندنا الجرأة نغيّر ونزيد ونحذف في أثاثنا وإكسسواراتنا ... ليه لازم نحطه مثل ماهو بالضبط؟
المفارش برضو صارت فكرة قديمة ومستهلكة ... الطاولة الدائرية إياها اللي في الركن موجودة ... الكوفي تيبل المفروض تكون أكبر وأضخم لأنها في مكان واسع جداً ... والطاولات اللي جنبها يبغى لها إعادة ترتيب ...

الورود الصناعية القبيحة تخيلوا لو كان مكانها طاولة صغيرة عليها مثلاً شوية كتب ومعلق فوقها لوحة؟ ...
السجادة الرخيصة ضايعة في اتساع المكان ... السيراميك أبو إطار ما غيره ...
هذي صورة لزاوية ثانية من نفس الصالة

شغل الجدران أوفر أساساً وتنفيذه أيضاً شيّء ... الصوفات مبعثرة صاير تقريباً على كل جدار وحدة ... أرجع وأقول السجادة ما أضافت أي جمال ... بالعكس صايرة كأنها حاجة مرمية على الأرض ... ياليت كانت سجادة أجمل وأكبر مفروشة جنب واحد من الجدران والكنب فوقها ملموم مع بعض مع كم لمسة إكسسوار حلوة

تنافر كبير بين الستارة وقطعة السجاد ... الورد المجفف اللي بيجنني ... لاحظوا بتلات الورد المنثورة على الرف ... هذي أولاً فكرة غير عملية ... كيف بيتنظف الرف وكيف تتنظف البتلات في هالجو الصحراوي اللي يوم غبار ويوم عواصف! ... الشي الثاني الورد المنثور ما يناسب مدخل البيت ... هذي حركات مكانها غرف النوم والليالي الرومنسية ... تنثرينها على رغوة البانيو ... على السرير ... على الأرض في نقطة معينة ... إلخ ... لكن بهالشكل أعتقد مكانها غلط ...

زحمة! ... بعدين يا حبيباتي والله ما أشوف المفارش والورود المجففة والصناعية أضافت أي جمال ... بالعكس تسوّي زحمة في المكان وتحسّسك بالملل من منظرها اللي صار مستهلك لأبعد حد ...

لاحظتوا إن أكبر مشاكلنا من ناحية التنسيق هي السجاد؟! ... أستغرب في مجلس استقبال مثل هذا إن كل شي فيه مدفوع فيه مبلغ وقدره ... ونجي على السجادة ونرمي على الأرض نتفة سجادة ضايعة وسط المكان وصاير منظرها بشع مسكينة وسط اللي حواليها ... برضو اللمسات اللي على الجدران لازم ندقق فيها ونعرف إيش نحط؟ ووين نحطه؟

الألوان هنا ما بينها أي تناسق ... لا لون الجدار ماشي مع الكنب ... ولا لون الكنب ماشي مع الستاير ... ولا الستاير ماشية من سجادة المكرونة يارب تنقطع من السوق ... للأسف أختي خانك تنسيقك خيانة عظمى ...

الـvelvet نفسه يعتبر نقش ... الكنب فيه نقش ... الطاولات ملبسة قماش بتقليمة عريضة ... الفازات الكبيرة المستهلكة ... الأشكال الجبسية اللي على الجدار ... تفاصيل كثيرة تربك نظرك وتشتت انتباهك ....
نشوف زاوية ثانية من الغرفة

هنا مع زحمة هالتفاصيل زادت الأمور بالزجاج المعشّق ... أعتقد الزحمة هنا وعدم الاتساق بين القطع واضح جداً ... وأنا متأكدة إن صاحبة البيت تعبت كثير في تأثيثه ... بس ساعات تغيب عنا أمور لو عرفناها في وقتها يمكن صارت الأمور أسهل بالنسبة لنا ...

وفي النهاية أهم شي ذوق الإنسان الشخصي وارتياحه للمكان اللي يعيش فيه ...

[/size]